समृद्धिको यात्रामा भरतपुर २२

इ चितवन खबर

April 20, 2025

चितवन । चितवन राष्ट्रिय निकुञ्जसँग सिमाना जोडिएको भरतपुरको वडा नम्बर २२ ले समृद्धिको यात्रामा आफूलाई तीव्र रुपमा अगाडि बढाउँदै लगेको छ । नेपाल सरकारले सन् २०२० मा सुचीकृत गरेको उत्कृक्ष् सय गन्तव्यभित्र पर्न सफल यस वडाले शिक्षा, स्वास्थ्य, पर्यटन, कृषि, पशुपालन, रोजगार र पूर्वाधार विकासमा महत्वपूर्ण सफलता हासिल गरेको छ ।

पछिल्ला दिनमा पर्यटकीय हबका रुपमा विकसित हुँदै गएको यो वडा जंगल सफारी, बोटिङ, थारु संस्कृति र जैविक विविधताका लागि पर्यटक आकर्षणको केन्द्र बनेको छ । ‘तपाईंको उत्पादन, हाम्रो समृद्धि’ भन्ने नारालाई प्राथमिकता दिएको यस वडाले किसानको जीवनस्तर सुधार्न अनुदान र प्रोत्साहनका काम सुरु गर्दै आएको छ । किसानको सहजताका लागि वडामा बहुउद्देश्यीय सहकारी संस्था पनि गठन भएको वडाध्यक्ष विष्णु महतोले बताउनुभयो ।

पर्यटकीय स्थलहरूको तीब्रत्तर विकासका कारण वडावासीहरुको जीवनस्तरमा सुधार आएको भन्दै वडाध्यक्ष महतोले पर्यटन क्षेत्रको विकासमा सक्दो भूमिका निर्वाह गरेको बताउनु भयो । यस वडाले शिक्षा क्षेत्रमा उल्लेख्य सुधार गर्नका लागि लागि संस्थागत, सामुदायिक र प्राविधिक विद्यालयको स्थापना एवम् सञ्चालनमा काम गरिरहेको उहाँको भनाइ छ । त्यस्तै, वडावासीको स्वास्थ्यलाई मध्यनजर गरेर १६ शय्याको अस्पताल सञ्चालनमा ल्याएको महतोले बताउनुभयो ।

स्वास्थ्य परीक्षणका लागि आधुनिक मेसिन सहित सञ्चालित अस्पतालमा आउनका लागि एम्बुलेन्स सेवा निःशुल्क तथा प्रयोगशाला सेवा पनि निःशुल्क गरिएको महतोको भनाइ छ । वडाले युवा र महिला लक्षित तालिम, सीपविकास र प्रोत्साहनका काम गर्दा वडावासीहरु थप लाभान्वित भएका छन् । अझ फोहर र ढल व्यवस्थापन गरिदिदा वडा सफा र स्वच्छ बन्दै गएको उहाँले बताउनुभयो । वडामा जम्मा भएको कुहिने र नकुहिने फोहोरलाई वर्गीकरण गरेर फोहोरबाट मोहर बनाउने योजना पनि ल्याइएको महतोले बताउनुभयो । वडालाई प्लाष्टिक र गुट्कामुक्त क्षेत्र पनि घोषणा गरिएको छ ।

राजस्व संकलनमा समेत वडाले उल्लेखनीय सुधार ल्याएको भन्दै उहाँले आर्थिक वर्ष २०७३/७४ सम्म ७, ८ लाख रुपैयाँ राजस्व उठाउने वडाले आर्थिक वर्ष २०८१/८२ को हालसम्म ८२ लाख रुपैयाँ राजस्व संकलन गरेको बताउनुभयो । जनताको जीवनस्तर उकास्न र आयआर्जनका स्रोत वृद्धि गर्न महिला, युवा र किसान लक्षित विभिन्न तालिमहरु पनि वडाले आयोजना गर्दै आएको उहाँले बताउनुभयो । पूर्वाधारको विकासबाट वडावासीको जीवनस्तर सुधारमा लागिरहेको वडाले नयाँ नयाँ अवधारणा सहित पार्क तथा भवन निर्माण गरिरहेको छ । जुन योजनामध्ये अम्बे्रला स्ट्रीट, स्टोन पार्क र कमलपोखरी प्रमुख छन् ।

त्यस्तै, वडाले कभर्ड हल, लाइब्रेरी, तटबन्ध, विपद् व्यवस्थापन केन्द्र, खानेपानी र जनताको घर निर्माण गरी पूर्वाधारका काम गरेको वडाध्यक्ष महतोले बताउनुभयो । वडाभित्र हालसम्म ५५ किलोमिटर सडक कालोपत्र भइसकेको उल्लेख गर्दै उहाँले वडाका सबै सडक कालोपत्र हुने तयारीमा रहेका जानकारी दिनुभयो ।