इ चितवन खबर

September 01, 2026

चितवन । रसुवा जिल्लाको भोटेकोशी नदीमा आएको अकल्पनीय बाढी तथा प्राकृतिक विपद्बाट प्रभावित परिवारको उद्धार, राहत तथा पुनर्स्थापनाका लागि मन्टेश्वरी एसोसिएसन चितवनले १ लाख ७७ हजार रुपैयाँ रकम सहयोग गरेको छ।

चितवन जिल्लाभित्र छरिएर रहेका मन्टेश्वरी विद्यालयहरूको छाता संगठनका रूपमा रहेको एसोसिएसनले आफ्ना सदस्य मन्टेश्वरी विद्यालयहरूबाट स्वेच्छिक रूपमा रकम संकलन गरी प्रधानमन्त्री राहत कोषमा जम्मा गरेको हो। एसोसिएसनका अध्यक्ष निराजन रेग्मी लगायत पदाधिकारीहरूले उक्त रकम प्रधानमन्त्री राहत कोषमा हस्तान्तरण गरेका हुन्। भोटेकोशी क्षेत्रमा आएको बाढीपहिरोबाट प्रभावित नागरिकको उद्धार, राहत तथा पुनर्स्थापनामा सहयोग पुगोस् भन्ने उद्देश्यले मानवीय सेवाका रूपमा सहयोग गरिएको एसोसिएसनले जनाएको छ।

प्राकृतिक विपद्को समयमा प्रभावित परिवारलाई सहयोग गर्नु सामाजिक उत्तरदायित्व समेत भएकाले एसोसिएसनले आफ्नो सामर्थ्य अनुसार राहत कोषमा योगदान गरेको अध्यक्ष रेग्मीले बताए। एसोसिएसनले आगामी दिनमा पनि विपद् तथा मानवीय सेवाका क्षेत्रमा आवश्यक सहयोग र सामाजिक गतिविधिलाई निरन्तरता दिने जनाएको छ।