इ चितवन खबर

April 29, 2025

चितवन । शैक्षिक क्षेत्रमै नयाँ आयाम थप्ने क्रममा भरतपुर-८, बिशालचोकमा रहेको पिस जोन इङ्लिस स्कुलले पृथक र आधुनिक मण्टेश्वरी ब्लक निर्माण गरी आफ्नो कार्यक्रम विस्तार गरेको छ। उक्त ब्लकमा वातानुकूलित कोठा (ए.सी. रूम), खेलकुदका लागि विशेष प्ले स्टेशन तथा गतिविधिमा आधारित सिकाइ प्रणाली समावेश गरिएको छ।

विद्यालयका शैक्षिक प्रमुख बिनय दवाडीका अनुसार यस नयाँ मण्टेश्वरी ब्लकले विद्यार्थीहरूको सर्वांगीण विकासमा सघाउ पुग्नेछ। “हामीले बालमैत्री वातावरणमा सिकाइलाई रमाइलो र प्रभावकारी बनाउन आधुनिक प्रविधि र पद्धति अपनाएका छौँ,” दवाडीले बताए।

नयाँ संरचनासँगै गतिविधिमा आधारित सिकाइ प्रविधिको प्रयोग गरिनु र खेलकुद सुविधाहरू थपिनुले अभिभावकहरूमा समेत खुशीको तरंग छाएको छ। एक अभिभावकले भने, “विद्यालयले यति राम्रो सुविधा र वातावरण प्रदान गरेको देखेर हामी निकै सन्तुष्ट छौँ। यो हाम्रा नानीहरूको भविष्यका लागि उत्कृष्ट छ।” विद्यालयले आगामी दिनहरूमा पनि अझ नवीन र गुणस्तरीय शैक्षिक कार्यक्रम ल्याउँदै जाने जनाएको छ।