इ चितवन खबर

August 13, 2025

चितवन। भरतपुर महानगरपालिका वडा नं. १३, ब्रह्मपुरीमा भएको चोरी घटनामा संलग्न व्यक्तिहरूलाई समाउन सहयोग गर्ने छ जना स्थानीयलाई चितवन प्रहरीले सम्मान गरेको छ। जिल्ला प्रहरी कार्यालय चितवन र वडा नं. १३ को समन्वयमा, इलाका प्रहरी कार्यालय गीतानगरको आयोजनामा भएको कार्यक्रममा उनीहरूलाई सम्मानपत्र प्रदान गरिएको हो।

सोही दिन बिहान ११ बजे, ६० वर्षीय विष्णु बहादुर गुरुङको घरबाट सुनका गहना र नगद रु. १,००,१५० चोरी भएको थियो। मकवानपुर बागमती गाउँपालिका-८, साततलेका ४२ वर्षीय दिल बहादुर सिन्तान र काभ्रेपलान्चोक तेमाल गाउँपालिका–५, पोखरी नारायणथानका ३५ वर्षीय मनराज तामाङ यस घटनामा संलग्न थिए। दुर्गा गुरुङ, रामकृष्ण कोईराला, प्रकाश आचार्य, अभय अधिकारी, सुमन सापकोटा, र मनोज गुरुङले चोरी गर्ने व्यक्तिहरूलाई नियन्त्रणमा लिन महत्वपूर्ण सहयोग गरेका थिए।

कार्यक्रममा चितवनका प्रहरी प्रमुख (प्रहरी उपरीक्षक गोबिन्द पुरी), भरतपुर महानगरपालिका–१३ का वडा अध्यक्ष प्रकाश दवाडी, वडा सदस्यहरु, इलाका प्रहरी कार्यालय गीतानगरकी प्रमुख (प्रहरी निरीक्षक) मिना देवी राई, वडा सचिव तथा कर्मचारी, र विभिन्न टोल सुधार संस्थाका प्रतिनिधिहरूको उपस्थिति रहेको थियो।

प्रहरी उपरीक्षक गोबिन्द पुरीले समुदाय र प्रहरीको सहकार्यले मात्र सुरक्षित समाज सम्भव हुने बताउँदै सबैलाई धन्यवाद ब्यक्त गर्नुभयो । यो सम्मान कार्यक्रमले स्थानीयस्तरमा अपराधविरुद्धको सचेतना, सहकार्य र आपसी विश्वासलाई थप मजबुत बनाउने अपेक्षा गरिएको छ।