पत्रिकाहरुको भिडमा प्रतिस्पर्धा गर्नु सहज थिएन : निर्देशक राजेश शर्मा आचार्य

इ चितवन खबर

June 02, 2025

चितवन । यहाँहरुलाई अवगत नै छ हामी पन्ध्रौं वसन्तमा प्रवेश गर्दैछौं । चितवनमा सर्वत्र खुलिरहेको पत्रिकाहरुको भिडमा आफूलाई परिचित गराउन कठिन कुरो हो र जोखिमपूर्ण कार्य पनि थियो त्यो । तर हामीले उक्त जोखिमलाई सहर्ष स्वीकार गर्यौं । पत्रिकाको प्रकाशन शुभारम्भ भयो ।

चितवनको विज्ञापन बजारले हामीलाई धान्न सक्ने नसक्ने हामी अन्यौलमा थियौ । तर हजारौं पाठकहरुको माया पाउने आशालाई शिरोधार्य गरेर पत्रिका सञ्चालनको आँट गर्यौं । अहिले उक्त आँटले उत्साहित बनाएको छ । यहाँ बेग्रेल्ती खुलेका पत्रिकाहरुको भिडमा प्रतिस्पर्धा गर्नु सहज थिएन । विभिन्न कठिनाईको बाबजुद प्रतिस्पर्धाबाट नै यहाँ सम्म पुगेका हौं । पत्रिकाको मुख्य आयस्रोत भनेको नै विज्ञापन हो । विज्ञापनकै माध्यामबाट हामीले हाम्रो प्रकाशनलाई निरन्तरता दिईरहेका छौं ।

कतिपय अवस्थामा ठुुला–ठुला बाधाहरु आईपरे पत्रिकाको नियमित प्रकाशनमा । तर हामी डगमगाएनौं । पत्रकारिताको क्षेत्रलाई व्यवसायिक बनाउने होडमा यहाँका कतिपय संचार माध्यामहरुबाट बजार बिगार्ने प्रयत्नहरु भए/गरे त्यसको सामना गर्न पनि चितवन खबर तयार रह्यो र लडयो पनि । यहाँ खुलेका केही दैनिक तथा साप्ताहिक पत्रिकाहरु दुई दिने घामछाँया भयो । अझ भनौं, पत्रकारिता क्षेत्रलाई नबुझेकाहरुले केही समयको रमाईलोका लागि प्रकाशन आरम्भ गरेर यस क्षेत्रबाटै विस्थापित भए । हामीले यसलाई पत्रकारिताको मर्म नबुझेकाहरुको लहरको रुपमा लिएका छौं । पेशा व्यवसाय कुनै पनि सहज हँदैन । हामीले यसलाई राम्रोसँग बुझेका छौं । कामको दौरानमा आएका बाधाहरु हाम्रा निम्ति पाठ भए ।

कहिले आर्थिक कठिनाई तथा कहिले अन्य कठिनाई हाम्रो पत्रिका प्रकाशनको क्रममा आए । त्यसलाई स्वीकार्दै अघि बढ्यौं र यहाँसम्म पुगेका छौं । कहिले कसैको हावादारी भनाईले हामीलाई गिराउने चेष्टाहरु भए यो सबै हाम्रा निम्ति पाठ बनेको छ । यहीकारण हामी अझ खारिएको महशुस गरेका छौं । यसलाई निरन्तरता दिंदै पछिल्लो दिनमा अझ सबल र सशक्त प्रकाशन हुनेछ भन्ने प्रतिबद्धता व्यक्त गर्दछौं ।