मुलुकको आर्थिक समृद्धिका लागि सञ्चार क्षेत्रको विकास आवश्यक छ : निर्देशक गोविन्द राज पाण्डे

इ चितवन खबर

June 02, 2025

चितवन । आम संचार क्षेत्रमा हामीले आफ्नो अभाव महसुश गरी भिन्न तरिकाले पत्रकारितालाई अगाडि बढाउने दृढ आत्मविश्वासका साथ वि.सं. २०६७ जेठ २० गते स्थापना भयौँ ।

चौधौं वर्ष सफलतापूर्वक पार गरी पन्ध्रौं वर्षमा प्रवेश गर्न पाएकोमा देश–विदेशमा रहनुहुने आम पाठकवर्ग, विज्ञापनदाता तथा शुभचिन्तक महानुभावहरुमा कृतज्ञ छौँ । यहाँहरुको साथ, सहयोग सल्लाह र सुझावका कारणले नै हामी यो स्थानसम्म पुगेका छौँ । हामी अझै पुग्नु छ धेरै माथि । आशा छ यो साथ, सहयोग निरन्तर रहिरहने छ । हामीले हाम्रो स्थापना मात्र ठूलो कुरा होइन भन्ने कुरा राम्रो सँग बुझेका थियौँ । हामीबाट आम पाठक तथा सर्वसाधारणले ठूलो आशा, भरोसा राख्नु भएको कुरा आत्मसाथ थियो । सोही बमोजिम अघि बढ्ने सङ्कल्प हामीले गयौँ ।

कुनै ठाउँमा कलम बलियो छ भने त्यो हो पत्रकारिता । बलियो छ भन्दैमा त्यसको गलत प्रयोग गर्नु पनि त उचित होइन । त्यसलाई हामीले राम्ररी मनन गरेर अगाडि बढ्ने प्रयास गयौँ । “निष्पक्ष, तटस्थ र खोजमूलक समाचार सन्देशको संवाहक’ भन्ने मूलमन्त्र सहित पत्रकारितालाई अगाडि बढायौ । चितवनको पहिलो र एकमात्र रंगिन राष्ट्रिय अर्ध साप्ताहिक पत्रिकाको रूपमा चितवनको आम सञ्चार माध्यमको रूपमा स्थापित भयौँ । हामीले पत्रकारितासँगै एक सञ्चार माध्यमले समाजका दीन–दुःखीहरूलाई सहयोग गर्नुपर्छ भन्ने सन्देश समाजसेवाको माध्यमबाट देखायौँ पनि । समाजसेवाको क्षेत्रमा हामीले गरेको त्यो सानो प्रयास समाज र आम सञ्चार माध्यममा प्रेरणाको स्रोत बन्ने विश्वास लिएका छौँ । समाजसेवाका कार्यक्रमलाई आगामी दिनहरूमा पनि निरन्तर रूपमा गरिनै रहने छौँ ।

राज्यको चौथो अङ्गको रूपमा स्थापित पत्रकारिता लुकेर बसेका घटनाको खोजी गर्ने, समाजमा रहेका विकृति, विसङ्गति, भ्रष्टाचारको अन्त्यमा महत्वपूर्ण भूमिका निर्वाह गर्दछ । स्वास्थ्य सन्देशको माध्यमबाट स्वस्थ समाजको निर्माणमा पनि यसको महत्व छ । मुलुकको आर्थिक समृद्धिका लागि सञ्चार क्षेत्रको विकास आवश्यक छ । आम पाठकलाई कुना–काप्चामा जानकारी दिन प्रभावकारी सञ्चार क्षेत्र आवश्यक छ । त्यसको लागि चितवन खबर पत्रिका सदैव प्रतिवद्ध छौं ।