ग्रीनल्याण्ड पब्लिक स्कुलको पिबिएल मेला सम्पन्न

इ चितवन खबर

December 16, 2025

चितवन । भरतपुर-१२ मा रहेको ग्रीनल्याण्ड पब्लिक स्कुलमा तेस्रो परियोजनामा आधारित सिकाइ (PBL) मेला सम्पन्न भएको छ। एक सातासम्म सञ्चालन भएको मेला भरतपुर महानगरपालिकाको शैक्षिक प्रशासन महाशाखा प्रमुख सुवासचन्द्र आचार्यको प्रमुख आतिथ्यतामा समापन गरिएको हो। मेलाको मुख्य दिन विद्यार्थीहरूले आफूले तयार पारेका विभिन्न सामग्रीको प्रदर्शनी तथा बिक्री गरेका थिए। विद्यार्थीले निर्माण गरेका कलाकृति, सरसफाइ सामग्री तथा खाजाका विभिन्न परिकार अभिभावक, शिक्षक र पाहुनाहरूलाई बिक्री गरिएको थियो।

कक्षा ७ मा अध्ययनरत साहारा मल्ल र सदाम आलमको समूहले साबुन, फिनायल लगायतका सामग्री उत्पादन गरेका थिए।विद्यालयमा आयोजना हुने यस्ता कार्यक्रमले व्यवहारिक सिप सिक्न सहयोग पुगेको उनीहरूले बताए। यसैगरी कक्षा ५ की छात्रा अपेक्षा दाहाल र उनको समूहले विभिन्न बिरुवाहरू उत्पादन गरी बिक्री गरेका थिए। केही दिनको मेहनतपछि उत्पादन गरिएका बिरुवाको राम्रो माग भएको दाहालले बताइन्। कार्यक्रमप्रति प्रतिक्रिया दिँदै अभिभावक शोभा ढुंगानाले परियोजनामा आधारित शिक्षा विद्यार्थीका लागि अत्यन्त उपयोगी भएको बताइन्। यसले किताबी ज्ञानसँगै दैनिक जीवनमा आवश्यक व्यवहारिक सिप विकास गर्न सहयोग गर्ने उनको भनाइ थियो।

विद्यालयकी प्राचार्य इन्दिरा कार्कीले शिक्षालाई जीवनसँग जोड्न यस्ता कार्यक्रम आवश्यक रहेको बताइन्। पिबिएल मेलाले विद्यार्थीलाई सानै उमेरदेखि उद्यमशीलता र आत्मनिर्भरतातर्फ प्रेरित गर्ने उनले उल्लेख गरिन्। सह–प्राचार्य उपेन्द्र आचार्यले अध्ययनसँगै विद्यार्थीको रुचि र प्रतिभा उजागर गर्न पिबिएल मेला कोशेढुङ्गा सावित भएको बताए। समापन समारोहका अवसरमा विद्यालयले लामो समयदेखि कार्यरत शिक्षक तथा कर्मचारीलाई सम्मानसमेत गरेको थियो।

विद्यालयको ३१औँ वार्षिकोत्सवको अवसरमा आयोजना गरिएको उक्त मेलाअन्तर्गत यसअघि महानगरस्तरीय हाजिरीजवाफ प्रतियोगिता, विज्ञान प्रदर्शनी तथा समुदाय लक्षित स्वास्थ्य परीक्षण कार्यक्रमसमेत सम्पन्न भएका थिए। सोही अवसरमा विद्यालयले अभिभावक दिवस पनि मनाएको छ।