इ चितवन खबर

April 21, 2025

काठमाडौं। ओम प्रतीकको लेखन/निर्देशन रहेको ‘मोहर’ साउनमा आउने भएको छ । निर्माण पक्षले यो चलचित्र साउन २३ गतेदेखि सिनेमा घरमा ल्याउने मिति तय गरेको हो ।

फिल्म मेकर्स प्रा.लिको प्रस्तुति रहेको यो चलचित्रलाई चुम्बन जंग शाहीले निर्माण गर्नु भएको हो । चलचित्रमा पल शाह, बेनिशा हमाल, नीति शाह, अर्जुनजंग शाही, मिथिला शर्मा, रवीन्द्र झा, लक्ष्मी गिरी, सुशील देवकोटा, बाल कलाकार सारा शर्मा लगायत कलाकारको अभिनय छ ।

हालै निर्माण पक्षले मुख्य अभिनेता पल शाहको केही तस्वीरहरू सार्वजनिक गरेको छ । सार्वजनिक तस्वीरहरूमा पल शाहलाई दर्शकले यसअघि नदेखेको फरक गेटअपमा देख्न पाउनेछन् । उहाँनले लामो कपाल पाल्नुभएको छ भने उहाँको हातमा भरुवा बन्दुक पनि देखिएको छ ।

दीपेन बस्न्यातको डीओपी रहेको चलचित्रमा कुमार महर्जनको एक्सन, भूपेन्द्र अधिकारीको सम्पादन, सुरेश अधिकारी र एसडी योगीको संगीत, प्रमोद ढुंगाना र हर्क साउदको शब्द छ । चलचित्रका मुख्य सहायक निर्देशक गिरिराज घिमिरे हुनुहुन्छ । कविराज गहतराज र रामजी लामिछानेको नृत्य निर्देशन रहेको चलचित्रको निर्माण नियन्त्रकमा लक्ष्मणराज पौडेल हुनुहुन्छ ।

यो चलचित्रको छायांकन दाङ, अर्घाखाँची, रोल्पा, प्युठान र काठमाडौंमा गरिएको हो ।