इ चितवन खबर

June 07, 2025

चितवन । चितवनको भरतपुर-१० मा रहेको ओम शान्ति एकेडेमीको आयोजनामा "दोस्रो अन्तर विद्यालय फुटसल कप-२०८२" हुने भएको छ । यही जेठ ३१ गतेदेखि विद्यालयको फुटसल मैदानमा हुने प्रतियोगितामा कक्षा १० (एसइई) दिएका विद्यार्थीहरु सहभागी हुनसक्ने विद्यालयले जनाएको छ ।

प्रतियोगितामा सहभागिताका लागि विद्यालयमा खबर गरिएको भन्दै विद्यालयका प्राचार्य टेकबहादुर श्रेष्ठले निःशुल्क रुपमा टिम दर्ता गर्न सकिने बताउनुभयो । एसइई दिएका विद्यार्थीहरुको प्रवेश पत्र टिम दर्ता गर्ने बेला बुझाउनु पर्ने भन्दै उहाँले जेठ ३० गतेसम्म टिम दर्ता गरिसक्नु पर्ने बताउनुभयो । टिम दर्ता गर्ने बेला तीन जना अतिरिक्त खेलाडी सहित आठ जनाको नाम दर्ता गराउनुपर्ने उहाँको भनाइ छ ।

टिम दर्ता गराउँदा खेलाडी सँगै एक जना शिक्षक र प्रशिक्षकको नामावली समेत बुझाउनुपर्ने उहाँको भनाइ छ । प्रतियोगितामा भाग लिने विद्यालयले आफ्नो खेलाडीका लागि आफैले फुटसल जर्सी र जुत्ता उपलब्ध गराउनु पर्ने भन्दै कक्षा १० भन्दा तल्लो तहका विद्यार्थी टिममा राखेमा टिमलाई नै अयोग्य घोषणा गरिने उहाँले बताउनुभयो ।

प्रतियोगिताको विजेता टिमलाई रु.१० हजार तथा उपविजेता टिमलाई रु पाँच हजार पुरस्कार सहित ट्रफी, पदक र प्रमाणपत्र प्रदान गरिने उहाँले बताउनुभयो । त्यस्तै उत्कृष्ट खेलाडी, शीर्ष स्कोरर र उत्कृष्ट गोलकिपरलाई समेत पुरस्कार प्रदान गरिने श्रेष्ठको भनाइ छ ।